Të paktën 35 persona kanë vdekur dhe dhjetëra të tjerë janë lënduar nga shiu dhe bora e papritur në zonat malore të Pakistanit, raporton BBC.
Në mesin e viktimave janë 22 fëmijë. Shumë prej tyre kanë vdekur si pasojë e rrëshqitjeve të dheut, kanë njoftuar autoritetet pakistaneze, përcjell gazeta online Reporteri.net.
Moti ekstrem ka përfshirë rajonet veriore dhe perëndimore të Pakistanit. Shumë zona kanë mbetur të bllokuara si pasojë e borës së madhe.
Ekspertët kanë thënë se janë të befasuar nga bora sepse Pakistani zakonisht përballet me lagështi gjatë muajit mars.
Nga departamenti për meteorologji kanë thënë se kjo borë e madhe është pasojë e ndryshimeve klimatike.
