Presidenti i Shteteve të Bashkuara të Amerikës, Joe Biden shpreson të ketë armëpushim nga e hëna e ardhshme në luftën Izrael-Gaza, ka raportuar BBC News.
“Këshilltari im kombëtar i sigurisë më thotë se jemi afër armëpushimit”, ka thënë Bideni.
Ministria e Shëndetësisë e udhëhequr nga Hamasi në Rripin e Gazës ka thënë se të paktën 29,878 njerëz janë vrarë në territor që nga fillimi i kampanjës – 96 vdekje brenda 24 orëve të fundit – dhe 70,215 njerëz janë lënduar.
Presidenti Biden, vendi i të cilit është aleati kryesor i Izraelit, ka folur për reporterët në New York për armëpushim të mundshëm.
Një zëdhënës i Departamentit të Shtetit të SHBA-së ka thënë më herët se “progresi” është bërë në negociatat për t’i liruar pengjet izraelite gjatë ditëve të fundit, por nuk ishte e sigurt nëse Hamasi do të pranonte ofertën.
“Kemi bërë progres në bisedimet mes Egjiptit, Izraelit, SHBA-së dhe Katarit”, ka thënë zëdhënësi Matthew Miller.
Izraeli ka thënë se forcat e veta po bëhen gati për të shkuar në Rafah për të sulmuar luftëtarët e Hamasit. Të dielën zyra e kryeministrit ka thënë se ka pranuar planet nga ushtria për të evakuuar civilët nga zona.
Izraeli ka qenë nën presion ndërkombëtar për të mos nisur ofensivën në Rafah, ku janë të strehuar rreth 1.5 milionë palestinezë.
Kryeministri i Autoriteteve Palestineze (PA), Mohammed Shtayyeh është dorëhequr së bashku me qeverinë e tij, e cila udhëheq zona të pushtuara në Bregun Perëndimor. Presidenti Mahmoud Abbas ka pranuar vendimin e tij. Abbasi është nën presion nga SHBA-ja për të reformuar PA-në, për të udhëhequr Gazën pas luftës mes Izraelit-Hamasit.
